مہر خبررساں ایجنسی کی رپورٹ کے مطابق، حزب اللہ نے اعلان کیا ہے کہ اس نے گزشتہ 24 گھنٹوں کے دوران صہیونی فوج کے ٹھکانوں، فوجی اڈوں اور صہیونی بستیوں کے خلاف 61 مختلف کارروائیاں انجام دی ہیں۔
حزب اللہ کی جانب سے جاری بیانات میں کہا گیا ہے کہ ان کارروائیوں میں خودکش ڈرونز کا استعمال کیا گیا، جن کے ذریعے صہیونی فوج کے اجتماعات کو شلومی، المالکیہ، حانیتا اور حولاتا کے علاقوں میں نشانہ بنایا گیا۔
بیان کے مطابق حزب اللہ نے صہیونی فوجیوں کے ایک پوسٹ کو کریات شمونہ میں بھی خودکش ڈرونز کے ذریعے نشانہ بنایا۔
دوسری جانب عبرانی میڈیا نے کہا ہے کہ دریائے لیتانی کے قریب حزب اللہ کے مجاہدین نے گھات لگا کر حملہ کیا جس میں صہیونی فوجی ہلاک اور متعدد زخمی ہوگئے۔
رپورٹ کے مطابق شدید حملوں کے باعث صہیونی فوجیوں کو علاقہ چھوڑ کر پیچھے ہٹنا پڑا اور وہ اپنا فوجی سازوسامان بھی وہیں چھوڑگئے۔
اسرائیلی چینل 15 نے بتایا کہ یہ حملہ اس وقت ہوا جب اسرائیلی یونٹ 890 کے پیرا ٹروپرز لبنان کی سرزمین کے کچھ حصوں پر قبضہ کرنے کے لیے پیش قدمی کر رہے تھے۔ اس کارروائی سے پہلے تقریباً 36 گھنٹے کی تیاری کی گئی تھی۔
آپ کا تبصرہ